Dr Peperoni:
S Theater wott, han y vernoo,
d Landschäftler nimme yyne loo.
Die sette me draa zaale, doch dängget draa bim zwänge:
Ooni d Basler uss em Baselbiet, wurd’s Tabourettli länge.
D Ländschäftler, die arme Sieche;
Y main do unseri Regio Grieche.
Die pfyffen us em letschte Loch und lyyde Hellegwaale.
Falls si dr Toni Lauber gseen, dien s em e warmi Subbe zaale.
Dr Doggter FMH:
Si, dr CEO vo dr Roche klaagt mir in einere Hyschtery
S hän alli Höheangscht im Turm – also Akrophobie
Ych hät dä Turm dr Regierig z Lieschtel gschänggt
Denn wär ihre Horizont nüm so beschränggt!
Druff sait d Schwester Gundula:
Ich glaub das Projekt wird schittere
Wo nüt isch chasch au nüt erwittere.
Dr Spitzbueb:
S isch Dies Academicus;
d Frau Gschwind fasst folgende Beschluss:
“Ych schwänz”, maint si ze sich elai.
“Wenn ich e Kuss will, gang y hai.”
E Baselbieter sait z Athen:
“Ych bin uss Lieschdel, du verschdeen?”
“Jä, ich verschtand”, sait druff dr Griech,
“doo hesch Gäld, du arme Siech!”
Und dr Singvogel:
Jetz will d Regierig z Lieschtel spaare, wo s nur goht.
Zem Byspiil s Logo wird jetz faarbloos anstatt root.
Und oobedrüüber glääbe – s isch nümm z underbiete –
statt de siibe Düpf symboolisch no fümf Niete.
