Als Wältkulduur sin miir als Bangg die Väärs go präsentiere.
Z fimpfte sin mer midenand, go d Woored zelebriere.
Vo Island bis Südafrika isch nie ebbis basiert.
Hänn denn d Saudis uff dr Lischte ghaa, jetzt singe mir no z viert!
Dr Toni Brunner nimmt dr Huet und maint, yy haa s jetz gsee!
E sone gscheit Entscheid, daas hättsch däm gaar nie gee.
Bim Wessels doo kaasch Gift druff nää, dää goot sicher noni.
Im Umkeerschluss bedyttet daas, dää isch no dimmer als dr Toni.
Am Baarfi wirsch verschlaage, bim Minschter wirsch no ginggt!
Am Claara goot s dr an dr Graage, an dr Mäss wirsch denn no glinggt!
Joo, Baasel haig e Gwaltbrobleem und drotzdäm gangi uuse:
Dehaime miessti, s isch extreem, mit dr Alte schmuuse.
Yylauff, Yyglemmts, Yydritt, Yystoo und Yybrächer,
E‑Sport, E‑Bike, E‑Book pfyyft s nei vo allne Dächer!
Nur ai «Yy» isch drnääbe und macht is wiirgglig wee:
Es kunnt us Bäärn, goot uff e Sagg und het am Änd e B!
An dr Formel‑E in Ziiri dien uns d Piloote laid!
Mit Raasemaaier Renne faare, macht bestimmt kai Fraid.
Und s Schlimmschti bi däm Hottere, fir d Faarer, s isch zem Gruuse:
egaal wie schnäll ass d faare duesch, kunnsch nie us Ziiri uuse!
E Mami goot in Groosse Root, s gheit alles us em Loot.
Dr Root dää gseet graad root, bis dä Binggis wiider goot.
Unsre Root, du glai Chaot, due no biztli waarte.
In vier, fimpf Joor isch s noonig z spoot fir in richtig Kindergaarte.
Si schwänze d Schuel und geen uff d Strooss fir e besser Glyyma.
Macht daas jede, s wäär famos, denn giecht s däm Glyyma wiider prima!
«Gege d Äärderwäärmig, s bescht Rezäpt», maint dr Trump und jetze spinnt er,
«Isch immerno ganz radikaal e nukleaare Winter.»
Leesli, kaufet Leesli, riefts bim Daamen-FCB.
Statt Cüpli in de Gleesli, het s Sandwich z frässe gee.
Leesli, kaufet Leesli, dr Schnäller isch dr Gschwinder
d Niete schteen scho uff em Fäld und als Hauptbryys griegsch en Inder.
Es isch halt woor, dää Bangg kaasch immer singe …
Es kunnt ächt jedes Joor, drumm diemer s wiider bringe.
Es wäär zwoor daasmol scheen, mir kennte driber schwiige,
doch d Granggekasseprämie stiige, stiige, stiige …
Schoggi, die macht gliggig, daas waiss jo jedes Kind.
Mit Endorphin im Hirni hausch kaim ains an dr Grind.
Toblerone git s jetz halal, dr fäärni Oschte schreit: Juhee!
Numme bi de Saudis griegsch kaschoggi me.
D Witwe Meier ganz ellai, het z Nacht e Grysch vernoo.
Drum lyttet si de Schugger aa, die miesse sofort koo.
Dr Schugger sait zer Meiere: «Jetzt mien si staargg syy und guet loose.
Hilf kunnt erscht in 15 Stund, dr Tesla steggt no an dr Doose.»
Kunnsch zrugg vom Wald, denn hesch bestimmt e riise Zägg am Ranze.
Die Vyycher sin glyych unnutz, wie so gruusigi Schtinggwanze.
Es näärve Wäschpi, Mugge, Bräme, Flöö und Silberfisch,
Doch alles numme halb so schlimm, solang s kai Schwoobekääfer isch.
Bis z letscht, do hämmer ghofft, ass d Mäss wiider wurd lauffe.
Bis z letscht, do hämmer ghofft, d Kyneese dien nid alles kauffe.
Bis z letscht, do hämmer ghofft, ass dr Negro-Rhygass-Namme blyybt.
Bis z letscht, do hämmer ghofft, ass d BaZ vernimftig schriibt.
Bis z letscht, do han y ghofft, yy kennt mi Gaashäärd sälber fligge.
Bis z letscht, do het er ghofft, si wurde d Fyyrweer ändlig schigge.
Bis z letscht, do hämmer ghofft, unser Drämli kunnt nit z spoot.
Bis z letscht, do hämmer ghofft, ass dr Wessels ändlig goot.
Bis z letscht, do hämmer ghofft, ass YB no abschmiirt,
Und bis z letscht, do hän diir ghofft, ass us däm Väärs no ebbis wird.
Sali zämme!