Dr Joel Thüring isch dä Maa
wo ohni z dängge schnuure ka
sy Kommentar dä kasch dr schängge
er isch nit dumm, hett nur Päch bim dängge
S Delifon schällt, sisch d Granggekasse
sie miesse d Prämie massiv abasse
mer hänn sofort abghängt, ohni ai Doon
d Schuggerey hett gwarnt vor Schoggdelifon
Es hett sich emool, e Aggtivischt
uff d Stroos gläbt, aber sone Mischt
s
isch e Sagggass gsi, niemert griegts mit
wenn er nit gstorbe isch gläbt er no hitt
Die kaibe Trotti rege is uff
steen nur umme und mache Buff
und zwar so dumm, dass nimm sicher bisch
obs nit d Schwizer Fuessballnati isch
Wenn dr Papscht emool hyroote sett
d Schwyz statt Wölf, wieder Saurier hett
gits Wältcöprenne z Zermatt uff Schy
und d Freie Stroos sott fertig sy
Mir hänn d Stadt abgsuecht und alles geh
aber niene dä Mike Müller gseh
wenn so viel Baize stärbe do am Rhy
muess doch irgendwo, dr Bestatter sy
Eine sait, das haisst rectal
e andre maint, nai anal
egal
wie mes nennt, kurz und barsch
d Margrethebrugg die isch am Arsch
Wäg dr Glychberächtigung wird gly
dr Petrus im Himmel e Petra sy
isch doch uns egal, sisch doch woor
s Wätter isch scho lang in de Wäggseljoor
Mir hänn gmaint, s Motto „vogelfrey“ stoot
wells um d Elisabeth Baume-Schneider goot
wo mer d Blagedde sehn schnuffe mer uff
sisch e Keefig und nit e Hiehnerstall druff
Die Roche-Türm sinn wenn me so wott
wie Himmelsstääge zem liebe Gott
jetzt muess me nur no e Stääge grabe
fir katholischi Bischöff, zem Deyfel abe
Bim FCB haissts zämme stoh
aber in de Reihe e Lugge lo
denn sisch ärnscht und kai Spass
bi Katastrophe machsch e Rettigsgass
Jans im Gligg und d Zircher schyssts a
sie hätte lieber dä Jositsch gha
wenn me fir d Zuekunft e Tipp darf gäh
statt em Jositsch dr Bettware-Fischer näh
