In dr Innerstadt do isch glii Dooterue.
Bäize, Hotel, sogaar am Rümmeli sind zue.
S Mascotte macht au dicht, mir sind dieff bedroffe.
Am Änd bliibt numme no d Gloobusbaugruebe n offe.
E Basswoort leere, daas isch scho lang verbii.
Hütt druggsch dr Finger druff ooder glotzisch drii.
Isch dr Doope verbrennt, liidisch Höllegwaale.
Hesch äin in d Schnurre griegt, denn kasch gar nümm zaale.
S isch Grieg und d Mensche flüchte voor dr Gwalt
us Soorg ums Lääbe, wenns rundumme gnallt.
D Schwiz het anderi Soorge, so dien mir beschliesse
So viili Wölf wie numme mööglig aabe z schiesse.
Faschtefeerie siige schiints ganz gsund und guet.
Es räinigt d Seel und s Gwüsse, Gnoche, Glängg und s Bluet.
S reduziert dr Stress, nimmsch ab, s entspannt di seer.
Und nääbem Buuch isch mäischtens au no s Konto leer.
Bim Seggs gits Sändwitsch, Schmätterling oder denn s Hündli
Alli maches, wie s grad basst bim Schööfferstündli.
Bi gstandene Eehebaar sig daas dr Favoorit,
dass är gäärn unde liggt und oobedruff isch nüt.
Stroom, Baan und Drämmli göön uffe mit de Briise.
Bstellsch zwäi Kaffi, gits e finanzielli Griise.
Angge, s Bier – alles isch düür, es duet äim wee.
S Düürschte sin die weenige Phünggt vom EffCeeBee.
Es git so Fluugi hütt, doo wurdsch is nie drii griege,
well männgisch Düüren uusegheie zmittst im Fliege.
Wenn d Bäch hesch rissts di uuse; s hilft dr au käi Flueche.
Solle mer äggscht dää Blatz für d Schwiigermamme bueche?
Kasch über Missbruuch würgglig Väärsli mache?
Über Kirchenussdritt, Seggte häärzhaft lache?
Die fromme Brieder ghöören eenter hinter Gitter.
Vom Lääderach käi Schoggi, – die isch für Kinder z bitter.
Är läbt vegaan, häizt d Woonig gnabb uff fuffzää Graad;
wäggsled d Wösch nuur all zwäi Wuche – mee wäär schaad.
Im Solaarkocher duet är d Häärdöpfel schwelle.
Zem Yoogakuurs fliegt er denne uff d Seschelle.
Doo baar Infos, wenn si z Baasel woone sotte.
Demos, Bättle und s Duube fietere sin verbotte.
S Drämmlibilljee gilt frei für e ganzi Stund,
wenn in dääre Ziit überhaupt e Drämmli kunnt.
Nomoll zu de Duube, daas hämmer miese leere.
Wenn men e z frässe git, dien si sich staargg vermeere.
S lüüchted ii und s ergläärt für Baasel akuraat
S gwaltig Wuechere vom Verwaltigsapperaat.
Tholl! Drizää Ränte! Mr wänns joo nit verschreie.
Mir wuurde s Gäld nie wie d Armee so uusegheie.
Statt Fluugschau Welocortège, Kanoone schiesse Schnee.
Vegaane Spatz, – dr Ooberscht kunnt vo dr d Häilsarmee.
Mir hänn uns gfilmt als Hünd uff Tiktok, nuur mir zwäi.
Im Pfäffergässli hinde lüpfe mir grad s Bäi.
Deerte brunze siider ganzi Hoorde.
Jetzt sin mer äntlig Influencer woorde.
