Dr Kim Yong Un missbruucht syy Macht, duet wiider mool broleete:
«Wäär iber myyni Fryyse lacht, däm schigg y e Rageete!»
Es bruucht e rächte Diplomaat, sunsch gryfft jo kaine duure!
Miir hätte doon e Kandidaat, dää haut em ains an d Schnuure!
S wird dunggel, jetz muesch Näärve haa, y duen e Stindli pfyyserle.
My Frau stipflet mi aa, kumm, mir dien e Bitzli schmyyserle.
Denn liis y no drei Stund e Buech, jetz gib’ mr gly dr Schuss.
Y wäär jo lieber ändlig, ändlig, ändlig, ändlig us däm Schänzlidunnel duss!
Baasel will, oh jeemynee, mee Expads aanelogge.
Fir uns git s glyy kai Woonig me, wel die scho dinne hogge!
D Ryyviera-Blään, die steen erscht groob, miir luege konschterniert –
Doo het doch wirglig son e Schwoob scho mit sym Diechli reserviert.
Dr Billy sait zem Hilly: «Dää Trump sott me vergifte!»
Druff sait s Hilly denn zem Billy: «Die Pille wurd y stifte!»
Doo lacht dr Billy iber s Hilly, du bisch e dummi Glugge!
Wel men in en Arschloch nur kaa Zäpfli iinedrugge.
In Spannie git s doch Spannier, wänn nimmi Spannier sy.
Die andre Spannier – z Spannie – hätte die als Spannier gäärn drby.
Daas Ganzi kunnt is spannisch voor, waas sell daas Lamentiere?
Wel, wetten unsri Ziircher goo – miir wuurde sofort aggzeptiere!
Vo nyyn Fraue, miir hänn gfrogt, hänn s zää scho duuregmacht.
Begrabscht, betatscht und bloggt, drotz Nai hänn d Männer glacht.
My Schwiigermamme maint entdyscht, nyyn vo zää isch mee als d Helfti
Numme mii längt kain me aa – bi allwääg graad die Elfti!
Dr Nadal haut s vom Hogger, muess viil zem Doggter goo.
Dr Roger nimmt s halt logger, het dr Doggter gschänggt bikoo.
Doggter isch nit Doggter, kunnt druff aa, wie Doggter titlisch.
Ganz sicher machsch dr Doggter, wenn dääre Dytsch vermittlisch!
Kameras, Alarmaalaag , dys Haim, daas wird zer Feschtig.
Aaber nur no duure Daag isch daas Theema leschtig.
Znacht kaasch alles ligge loo, goosch ganz beruhigt go pfuuse.
Wel denne faart kai Dreier me bis uff Saint-Louis uuse.
Glyymaschutz goot alli aa! Friss Maade, Milbe, Grille!
Ooni e schlächts Gwisse z haa, kaasch dy Däller fille.
Wenn s speeter wiider uuse kunnt, wird Waarte delikaat
Und glyy hesch CO2-neutral die nägscht Portion baraad.
De Kinngelzichter z Mältige, isch s Zichte bitz verdorbe,
Wel sälle mit de scheenschte Kinngel – dää isch laider gstorbe.
Sy Dochter eerbt dää Haasestall, em Babbe gruust s im Himmel
Jetz kunnt s sowit, im dimmschte Fall, hänn d Bunnys denn e … –
sali zämme!
