Die Lokalfasnacht hat in diesem Jahr endlich wieder einmal ein Lokalsujet. Uns wurde der Zeedel zu einem weiteren Sujetvorschlag zugespielt. Das Sujet hat es leider nicht zur Blaggedde gebracht, stimmt uns aber trotzdem optimal auf die Fasnacht am kommenden Samstag ein.
Birsfälde wirkt mit oder jedem Blätz sy Quartierplan
Mi Stirn legt sich in Falte:
was soll y jetzt wyyder vo dääre Sach halte?
Fascht täglich wirsch jetzt konfrontiert
und mit neye Bauprojäkt bombartiert.
Birsfälde wird verdichtet
und Du zem Mitwirke verpflichtet!
Amene Mitwirkigsverfaare
kasch uf Plän und gschöönti Bildli staare.
Du gisch Dir mieh, y sags profan,
Du wirksch mit und hesch kei Plan.
Kasch depatiere yyber Waggerstei
und sunsch no yyber allerlei,
wo lost dy Rollator, Rollstuel oder Kinderkaare
holprig yybers Zygs lo faare!
Sogar wie De mit Dym Kaare
in Zuekunft kasch dur Birsfälde faare,
ob oben oder unde dure,
do dryyber kasch au go schnure.
Drum los! Ans näggscht Mitwirkigsverfaare
und glyy druf bisch du Dir im klaare,
dasch alles nur dumms Gschwätz
und zämmegfasst in e paar Sätz,
kasch gar nyt verrichte,
au wenn sy in dr Zitig so scheen dryyber brichte.
Friss oder stirb, do hesch dr Drägg.
Adje zämme, y zyygle wägg!
Doch vor luter klaage,
so eifach los y my nit verjaage!
Es git au e Mitwirkigsverfaare, wo sich loont
und dy Närve vo Bürokratie und so Glums verschoont.
Es heisst Fasnacht und gits au do in Blätzbums.
Kasch mitwirke mit ruesse, intrigiere und ebbe kei so Glums.
Dr Inhalt isch au ganz anderscht gwichtet:
es wärde nämmlig nur Mensche verdichtet.
Und dr Bligg isch wägg vo dr Zuekunft im Jetzte
und wott mit tolle Momänt Akzäntli setzte.
S’Grossi Ziel heisst Gmeinsamkeit
und holt Dy us dr einsamkeit.
Teil Dyni Plän und Ydeä
yyber Aktuells, Politischs oder Wältegscheä.
Oder magsch kei so grossi Gschicht?
Kunsch eifach mit eme fründlig Gsicht!
Gib Dir e Rugg, es wär dr Hit:
schnabb Dir e Larve und wirk — mit!
