Am gleichen Tag, an dem der Ständerat die Waffenausfuhr in Bürgerkriegsländer frei gab, hat er auch den Gegenvorschlag zur Konzernverantwortungsinitiative versenkt. Die hochlogische Begründung — oder war es Zynismus? — war, dass damit der Schweizer Wirtschaft geschadet werde und dass es für die wenigen schwarzen Schafe und Schafböcke (zur Geschlechtergerechtigkeit) kein spezielles Gesetz brauche.
Da erst kürzlich die Fasnacht zuende ging auch hier ein fasnächtlicher Kommentar mit dem Zeedel der iggs, meiner Lieblingsgruppe, die vor all dem Desaster am liebsten ins All emigrieren möchte. Ewägg, ewägg, ewägg von dieser kaputten Erde:
Es het e Mool in kalter Nacht
Dr Urmensch s erschte Fyyrli gmacht
Mit grossem Gschrey und luuthals grunzt
(Zum s Lesche wird als driiberbrunzt)
Mit Pfyyl uss Stai, so duet är jaage
E manggem Mammut goot s an Graage
Was sich nit zyttig duet verstegge
Bringt är so schaamloos um en Egge
D Innereye ganz versässe
Wärde z Oobe gnisslig gfrässe
Duets der Nochber nit verdraage
Wird em uff e Schädel gschlaage
Und sälle wird, es deent no glunge
Bym näggschte Frässe au verschlunge
Gmordet wird, will är isch halt
E grosse Frind vo roher Gwalt
Dr Gliehwurm, d Schlange, sunnschtigs Vee
Kasch uff sym Spyysezeedel gsee
Bluet wo spritzt, e Gnoche gracht
Bref: Dr Steergger gwinnt — an Macht
S isch no hit e kalti Nacht
Fasch dääglig wird e Brandhärd gmacht
D Menschhait duet, me glaubt s fascht nid
Gedangglig all die Joor kai Schritt
Zem z oberscht uff dr Laitere z stoo
Dien vyyli yber Lyyche go
Me zieht in Grieg, will s sich duet lohne
Verdeyflet and’ri Religioone
S an’re Gschlächt, en anders Dängge
Zahn um Zahn, duet sich nyt schängge
Me baut sich Muure, Stacheldroot
Schiggt ganzi Velgger so in Doot
Und hilft me uff em Flichtlingsboot
Isch s fir e Rettig mänggmool z spoot
Eb Gäld, eb Gold, eb Gas, eb Eel
S isch immer Balsam uff ai Seel
Bluet wo spritzt, e Bombe gracht
Dr Steergger gwinnt derby — an Macht
Scho dr Aris by de Grieche
Gheert zue dääne glunge Sieche
Wo am Dootschlaag sich erlaabe
Und im Bluetbaad gnisslig baade
E Tyrann gheert uff e Thron
Sait sich au dr Mars in Rom
Ob Römischs oder s Dritte Ryych
S Muschter blyybt emänd fasch glyych
Wär s Fiehrerdängge do verachtet
Wird ganz aifach aabegschlachtet
S git hit, nit nur em Aaschyyn aa
No Diggdaduure z Afrika
S duet dääglig d Daagesschau verroote
Ass au im Oschte no Dischpoote
Ooni mit dr Wimbb’re z zugge
S aige Volgg dien underdrugge
Es metzlet aabe, faadegraad
Dr Terror vom Islaamisch Staat
Die Ryyche dien, muesch s nit verstoo
Wär arm isch halt verhungere loo
Und z Amerika, s isch schaad
Isch Bresidänt e Psychopath
Es het e Mool in kalter Nacht
Dr Urmensch s erschte Fyyrli gmacht
Doch by dämm historisch Schritt
Waiss är in dr Heeli nid
Ass – wenn me bitzli yyberdryybt –
Sy Entwigglig stegge blyybt
So git dr Mensch, vyllicht zem Drutz
E fiechte Furz uff Klimaschutz
Ar goot zwoor nimm go Mammut jaage
Duet aber Drägg in d Wältmeer draage
Duet Räägewälder aabeholze
Dermit kasch mee Rendite bolze
Uff em Land, wo unverhoole
Andre Velgger fräch hesch gstoole
An d Umwält wird scho gar nimm dänggt
S isch mir doch glyych, wenn s Dir nimm länggt
Jetz kunnt vyllicht die kalti Nacht
Wo ebber s letschte Fyyrli macht
Zem Lesche muess är nimme braiche
S isch Wurscht, wo n är duet aanesaiche
Dr liebi Gott verwirft nur d Händ
Denn d Mamme Ärde isch am Änd
Sy liggt uff ihrem Stärbebett
Will dr Mensch sich grichtet het
So lang no z warte, het kai Zwägg
Mir sinn … ewägg … ewägg … ewägg …
