De Russe hätti s ooni Dooping niene glängt.
Luegsch dr Putin aa; mer hän s scho immer dänggt.
Dr Schneider-Ammann setti au so eppis nää.
Bis jetze hänn s em numme KO-Drepfli gää.
Bim U‑Abo wird gspaart, isch daas glaaroo?
Gaifered wild entschlosse d Sabine Pegoraaroo;
die, wo im Verkeer sunscht allewiil so stramm isch.
Woorschints waiss die gaar nit, waas bi uns e Dramm isch.
In dr Schuel bsuecht s Käthi Müller s Niiwoo A.
S isch deert, wills nit guet schriibe und nit rächne kaa.
Wäär es im Niiwoo E oder im Niiwoo P,
denn könnti si vilicht e ganz e bitzli mee.
Die vom Schwizer Vierer dreniere scho sit Joore.
Drum het daas Team in Rio gwunne, nit verloore.
Im Roothuus ruedere si au verbisse viil,
in jeedi Richtig – ooni Thaggt und ooni Ziil.
D Frau Kuenz kauft in dr 
Boscht e Dotzed frischi Weggli.
S Fröläin am Schalter phaggt die Weggli in e Seggli.
No wott si no n e Brief uffgää: Ou Schregg!
Das macht d Boscht nimme, Frau, fir daas gosch hit zem Begg.
Ass me Koraan verdäilt, steert is wiirgglig nit.
Eb Wachtduurm, Griegsruef, waas es halt so git.
Mir sin thoolerant, nit orthodox, nit sträng.
Wuurd s niemerts gsee, verdäilte miir dr Rädäbäng.
Wenn jeede Flägge an dr WM schutte kaa,
denn mälde mir s Gläibaasel bi dr FIFA aa.
48 Teams, dä spinnt, dä Infantini;
so viil Gäld het käin fir d Bildli vom Panini.
Kai Pfuus mee – dunggel wird s; s blibt blötzlig alles stoo.
SRF het s Baaselbiet als Bispiil gnoo.
Dasch kai Zuefall; s isch glaar, dass me daas sett,
well d Regierig deert scho lang e Blackout het.
In dääre Faasnachtskischte hän mer zunderscht unde
e Väärs und Helge vo de Spyyrhind gfunde.
Dä Väärs isch äifach und didaggtisch loogisch
voor allem aaber isch er suupherpädagoogisch:
Puliranthanam, Mehmet, Nadia, Vito,
Bascha, Sedat, Allpullu, Hidir, Palito,
Svedir, Zora, Hans, Ajit und Kuväsi
so häisse d Kinder vo n ere eerschte Glass im Blääsi.
D Masseiiwanderigsiniziatiive mien au miir umsetze.
Dr langjäärig dütschi Zeedelhund us Hamburg mien mer drum ersetze.
Dä Inländervoorrang setzt is zimlig zue.
Dr Nei kaa nyt, aaber kunnt us Rooteflue.
In Wald go bröötle, Suppe koche, e Schnitzeljagd,
am Samschtig het is amme s Pfaadifieber phaggt.
Hit löön mer unsri Goofe s Laagerlääbe gniesse,
nuur nit im Wallis, well si deert uff Wölfli schiesse.
Halloween great, Faasnacht Fake, a big disaster!
Uff sälli groossi Schnuure ghöört e groosses Pflaschter.
Em Trump si Twitter-Gschwaafel isch is dotaal wörscht.
Fuck America, fir uns blibt Baasel förscht.
S vegaane Beeatrice isst Haaselnüss und Rinde,
well in däm Mönü losst sich gaar nyt Dierischs finde.
Seggs het sie nuur mit Fraue und Eunuuche,
well die bim Höpperle käini Äier bruuche.
