An dr Uni het s e WC, dert druff kaasch num­me goo,
Wenn diwäärs bisch, transstäärnli, nit Maa no Frau – jä oder soo.
Miir fin­de Sex wie s well, me kaa s doch aifach loo
Und schrii­be Schis­si mit viil Blatz – sit­zen oder stoo.

Imne Hotel in Ber­lin isch en Agwaa­ri­um explodiert.
D Fyyr­weer und au d Schug­ge­rei, die lue­ge konsterniert.
Daas Was­ser het drum uff dr Strooss e Swim­ming­pool kreiert
Und die erschte Schwoo­be hänn – scho mit em Diech­li reserviert.

Miir alli lee­re waar­te – waas bstellt isch, viil z spoot kunnt.
Dangg Ängbäss uff dr gan­ze Wält, laufft d Liif­rig nim­mi rund.
Mir waar­te daage‑, wuchelang und fyy­len is voll brellt:
Mir hänn die Poin­te fir dää Väärs hit uff die Säggsi bstellt.

Im Kon­si an dr Kas­se haan i dr Xah­ka voornedraa.
S Fro­lein frogt bim Thyp­pe und luegt en schmach­tend aa:
«Hänn dr non e Super­card in vot­re Portmonée?»
«Nai, yych samm­le kai­ni Phinggt, y schutt bim FCB!»

Y

Y schaff bim Staat im Taggt, doo ver­ge­en der d Flause:
S git Znyyni‑, Zmitdaag‑, Raucher‑, WC- und au Zvieri-Pause.
Jetz wänn die oobenaa­be, miir wird s lang­sam z bunt!
Wie mach i all die Pau­se in nur 38 Stund?

E Fraue-WM in Katharr, daas wääri doch dr Hit!
Doch die Lyynduechträäger dert, die wänn daas sicher nit.
Fuess­ball spiile in dr Bur­ka wäär jo aigent­lig no toll:
Denn hätt i mit aim Bild­li s Pani­ni-Album voll!

Bisch e Gly­y­ma-Agg­ti­vischt muesch mit em Noo­dail ken­ne lääbe:
Wäschisch d Händ nit vor em Saiche,
bliibsch mit em Lyym am Pfyff­li glääbe.
Gläbbsch di gweer uff d Auti­ba­an, fin­de miir s no haart:
S Gly­y­ma hesch kai Bitz­li gschitzt, wenn di e Tes­la iberfaart!

Syt y waiss, ass Bla­stigg schlächt isch und dr Umwält seer duet schaade,
Deerf mi Bing­gis nim­mi mit de Fli­ige­li go baade.
Bevoor är z Rieh­che schwimmt – duen en uff em Bänggli rut­sche loo.
Mit soo viil Spris­se in sim A … – Oh! – kaa dää nie­mools undergoo!

Als Win­ne­tou an d Faas­nacht , kaa me mache, sott me nim.
Und als Wag­gis bisch nit sicher, isch die Aaeig­nig soo schlimm?
Zune­re kul­tu­rel­le Misch­le­te saa­ge miir gla­ar: Nai!
Drum, bit­ti, lie­bi Ziir­cher, bliibet joo dehai!

Am Oobe nach em Znacht ver­zell i none Gschicht.
Doch well s nimm Win­ne­tou deerf sy, macht my Soon e dru­u­rig Gsicht.
Mit em Micha­el isch Ende, well Jim Knopf isch jo ne Moor!
Drum liis i jetz mim Bing­gis – pädagogisch wäärtvoll – us em Play­boy voor.

Doo Letsch­ti in dr Soli­tu­de, daas saag i ganz betroffe.
Bin i ame doo­te Trot­ti uff em Trot­toire duuregloffe.
Die Trot­ti lig­ge steen im Wääg, daas het miir gruu­sig gstungge.
Do isch daas blee­de Trot­ti – ups – im Rhy versungge …

Dr Käpten Kirk, dää fliegt dur s All, duet Bla­nee­te duurechegge.
Zem deert wo nie e Mensch gsi isch, Neiland goo z entdegge
Waas goot dää deert go sue­che, in Baa­sel wäär är glyy.
Well: im Kunschtmu­see­um­par­king isch au no nie ain gsi!

Dr Black­out macht mir Sor­ge, ooni Stroom wäär nämlig Schluss!
Kai Net­flix me, kai Sky, ojee, und au kai Dis­ney plus.
Drum schwätz i jetz mit min­re Frau, will vor­be­rei­tet syy.
Und meerg denn graad so nääbeby, s schi­int ganz e Nätti z syy!

Mit de Tee­nies isch s hit soon e Sach, d Erzieig s gros­si Theema.
D Doch­ter strai­ggt und reb­be­liert, basst nit in unser Scheema.
Am Zääni muess si jetz ins Bett, die Ree­g­len isch dr Hit!
An d Zyt duet si sich hal­te, nur d Adrässe, die stimmt nit.

Die ain­te wet­te d Sum­mer­zyt, die and­re Sta­tus quo.
Die Drit­te fin­de d Win­ter­zyt, die miesst me sicher loo.
Waas sell die ganz Debat­te, mir saa­ge, sig s wie s well.
Miir woo­ne dert im Schat­te – dert isch sowie­so nie hell.

Vor eich stoot dr erschti, eroo­tisch Schnitzelbangg.
Miir zien zu uns­re Väärsli ganz gäärn au scho mol blangg.
Wenn iir daas wottet wel­le gsee, denn kosch­tet daas e Riise.
Oh z spoot, jetz het s vom Käller nääbedraa mit Twint ain überwiise.

13 Joor unterwägs

 

Fasnacht 2023: Dipflischysser
Fasnacht 2023 Bilderkaleidoskop 3

Deine Meinung

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.