D Regrute hänn Verschiebig, es goot zem Waffeblatz.
S git e Handgranaateniebig, jede griegt e Satz.
Dr Müller gniblet scho am Ai, dr Meier luegt duurtriibe:
«Die Handgranaate nimm i haim, y schmaiss mi Samsung siibe!»
Zem di im Drämli an dr Stange heebe und bim Schnizze bruuchsch si au.
Bruuchsch si zem dr Abfall in dr Kiibel leege – zem an dir spiilen ooni Frau.
Wenn di gratzisch, wo s dr Yogi bisst, dien die Pfoote gruusig stingge!
Drum, diir Leerer, diend nit so, dien dääne Schieler lieber wingge.
Dr näggscht Väärs isch e Loobgedicht iber e gwissen Erdogan.
Dr ainzig woori Demokrat, ganz ooni Gressewaan.
Wenn nur dänggsch, waas von em haltisch, denn duet är dii nit gwääle.
Aaber wenn s nit fir di bhaltisch, kaasch dyni Zälle sälber wääle.
Ussem Gellert, uus dr Breiti, waas gseet me? Halt dää Duurm!
Vom Joggeli, vom Bruederholz, waas gseet me? Halt dää Duurm!
Ussem Gundeli, vom Gotthälf, waas gseet me? Halt dää Duurm!
Vo dr Dalben und vom Glyybi, waas gseet me? Halt dää Duurm!
Ussem Wettstai, vom Mathäus, waas gseet me? Halt dää Duurm!
Ussem Iseli, vom Santihans, vom Clara? Halt dää Duurm!
Die halb Stadt hoggt im Schatte und d Auge dien dr wee!
Drum baue si dr zwaiti Duurm – denn muesch dr erschti nimmi gsee!
Daas Bildli zaigt dr Gläppere, bis wohii si s kaa lo schnättere.
Wenn si usserhalb duet gfätterle, denn duet s vom Staat häär heftig tschättere.
Soo Pictogramm an d Gränze, denn giecht s is nimm so schytter:
Denn wäär au jedem Schwoob graad glaar – bis do aanen und nit wyter.
Zyyl- und au no aarbetsloos, liggt äär uns fascht scho uff dr Däsche.
S RAV sait em au schoonigsloos, äär sigi halt e Fläsche.
Zem Gligg git s doon en Aagebot, wo dii und mii wurd gruuse.
Au wenn en dert au niemer wott, trainiert är jetz Schaffhuuse.
Au äär isch zyyl- und aarbetsloos, liggt uns au fascht scho uff dr Däsche.
S RAV sait em denn gnaadeloos, äär sigi no die gresser Fläsche.
Dr Murat hoolt en uff Schaffhuuse in sy Trainer-Staff.
Denn sitzt halt negschti Saison graad dr ganz Club uff em RAV.
Mit mym glaine Stumpe spiil y Miilistai.
Y loon in scho lo gumpe, doo sait miir doch dää Glai.
Du, Bappe, dyyni Thaggtig, kenne z Bäärn ganz vyyli!
Und neischtens in dr CVP, nennt me s «Figgi Miili».
YY glaub, y wird psychootisch, well dert und dert und dert und do – sitzt e Pokemon!
Es isch dotaal kaootisch, die Ballekämpf am Deelifoon …
Jetz gseesch au no dää Shiva – an jedem Eggen, yy drai duure!
YY mainti, soone Dyp wie dää, bruucht au e Ball an d Schnuure.
Die Aaschlääg iberall, die machen is bedruggt.
Kaasch nimm furt, daas isch fadaal, well d Angscht macht di verruggt.
D Schugger hänn ain phägglet, är brielt: «Y wurd s begriesse,
Me loot mi aifach mit mym Gweer s Obligatorisch schiesse!»
Im e groosse Huffe Schnee, do han y aine gsee.
Isch umgheit, jeminee, däm duet sicher alles wee!
I han em welle hälfe, är sait: «Due mi nit so blooge.
Daas isch die Saison s erschti Mool, ass yych so wiit bi gflooge!»
Miir gimperle ins Desart und walke denn in Schluuch.
Mit eme Spuurt geen mer in d Riobar, dr Sprint in s Tis isch zimli ruuch.
Jetz wangg i no in s Hirschi – y bi scho zimli bsoffe …
My Gsundhait wird s mer dangge; bi my Daagessoll jetz gloffe!
S Hilly sait zem Billy: «Miir bruuchen e Plan B!
Dr Trump muess wägg, daas will y, als Präsidäntin wott mi gsee.»
Druff sait dr Billy denn zem Hilly: «Yych hilf der, muesch guet loose,
Y lyt graad dr Levinsky aa, die sell em ain go …» – sali zämme.
