Mi Maa dä het grad zimmlig Mieh mit Gliichberächtigung
Nachem Job no Huushalt mache, bring yyn usem Schwung
Ich rief yym so vom Sofa uss, grad gmietlig liicht am chille.
„Gäll, muesch denn no in grosse Rooot, schnäll unser Kind go stille“
Dr Baschi Dürr het Aatraag gstellt, är bruch jetzt no mee frey
Dr Donschtig well är no drzue, wäg däre Grampferey
Dr Grund liggd uff dr Hand, isch zwiifelloos au vo Belang
Wäg sim Teslastromverbruuch, lauft d Wösch dopplet so lang
Bi de Schwoobe gits jetzt bald, i weiss net isch das rächt
Net nur Fraue und au Männer, sogar s dritte Gschlächt.
Me rächnet jo net do drmit, dass die sich no vermeere.
Hoffentlig dien Zircher do drfoo denn net zvill leere.
Bi me Origamikurs, dasch Falte mit Papyyr
Hani gleert so Tierli z falte, s brucht e bitsli Gspyyr.
Die Sach isch wirgligg kreativ, löst s Parkbroblem vom Schatz
Si Auti het jetzt dangg däm Kurs i mim Handtäschli Platz.
Zweihundertdrissig Tonne Fleisch, es isch e Sauerey
Sin gschmugglet worde dure Zoll, ai Kilo wär nur frey.
Die hän kai Aahnig, wie mes macht, muesch offiziell dra goo
Hätt Kieh und Säu als Alpufzuug, grad iber d Gränze gnoo.
Es isch jetzt wieder trendy, losch als Frau e rächte Busch
Drum muessi nimm rasiere, weni zoobe amigs dusch
Mi Schatz maint, das isch cool und findets au no fotogeen
„Kasch alles frei lo wachse, nur net d Hoor uf dine Zeen“.
Mi Urolog het gsait Frau Länzli, lueg sii sin Stairyych
Nur wäg de glaine Stai im Buuch, was soll den dä Verglyych?
Jä, ryych si isch im Alter, denn net wirgligg mi besträbe
Im Altershaim in Laufe, nimmt me dir wäg däm gar s Läbe.
Wäg däne Anglizisme hani scho e bits dr Blues
I feel me net so sunny, s haut mi drum grad us de Shoes
Doch bi Dail Politiker, e weeneli zem Lache
Tönts cooler, dä isch crazy — als dä isch doch net ganz bache.
Probier e mol e Kilo abznäh, gäll das isch no schwär
Bisch mängmol rächt am hungere, dr Maage isch au läär
Damit i ändlig Gwicht verlier dringg ich au gar nimm Goggi
Doch s Schwierigste bi däm Problem, isch s ässe vo ka S©hoggi.
Halal, das heisst erlaubt, drum derfi Toblerone ässe
Das stoht jetzt neu dert druff, stosst aber net uf Interässe.
Erlaubt isch das wo gfallt, es isch egal, was do passiert
Drumm het dä Pfaff vo Rieche au die Buebefiess massiert.
Jä nei, wie bini gschoggd gsi an dr letschte Modeschau
Do lauft dört sone Wäse, dängg no, isch das ächt e Frau?
Die het drei Brüscht gha, genmutiert, sii das isch net dr Börner
Das kunnt, we me die Milch dringgd, vo so Kieh ganz ohni Hörner.
En aignes Gschäft, das wär mi Traum und hätti allzugärn
Jetzt isch die Chance ändlig do, i frey mi wie ne Stärn
Im Friehlig isches denn sowit, das wird au iine gfalle
Die riise Länzli Wöscherei, in lääre Mubahalle.
Letschti in dr Migros näbem Gstell vo däm Aquella
Fliegt eini schreiend um und meint ich siigi d Uriella
Ähnligkeit do zwüsche uns isch nur dä schwarzi Wuchs
Denn ich fahr Fiat Panda und die ander Fiat Lux.
Dr Achti Meerz isch Tag der Frau und dä isch zimmlig wichtig
Es zeigt uns Gliichberächtigung goht in die richtig Richtig
In unserm Bangg isch das nyt neus, mir hän uns zämme grauft
Är isch dr ainzig Maa mit Burka, wo mir noche lauft.
Bis zletscht han ich jetzt gsunge, s goht dr Muba au esoo
Dr Unterschiid isch nur, ich wird denn snägst Joor wieder koo
Zyt isch leider au verbii, s isch scheen gsy in däm Gränzli.
Saag aadie, und uff bald emool, yyre Bangg Frau Länzli.
