Für e aifache Roll­stuehl-yschtig ins Tramm
lüpft d’ BVB s’ Trot­toir de Schine entlang.
Drfür fliege d’ Velo uff d’ Schnu­ure fascht stündlig,
got­t­lob sin d’ Halt­stelle behinderte-fründlig.

Eini­gi Lütt sin erfol­grych und schlau
verkaufe dir alles, d’ Gross­mueter grad au.
Am Änd sin si wie d’ Maierys­li im Wald,
wenn dr Wind kun­nt ko bloose — denn ver­wälke si bald.

Dr Pierin Vin­cenz dä pfyfft uf d’ Moral
und bolzt flis­sig Speese im Striptease-Lokal.
Är sait Beziehigspfläg das bruchtis halt
und dr Wind isch ko bloose — ver­wälkt isch är bald.

Nai zu Rasiss­mus sait dr Infantino
und losst sich bestäche, sufft gärn tüüre Vino,
jet­zt wohnt är in Qatar will’s ihm dött guet gfallt.
I hoff dr Wind kun­nt ko bloose — und är ver­wälkt bald.

D’ Moral vo dr Gschicht isch, das tscheg­gt me bald,
in jedem Johr git’s neui Maierys­li im Wald.
Und während du glaub­sch, die kriege mr draa
sin dini Bit­coins scho wärt­los — und di Traum­frau e Maa.

Für dr Abschuss vom Schi Schin-Ping sim Ballon
bru­uche d’ Amis acht Dääg — was für e Hohn.
No scham­par viel länger hän mir lyyde miesse,
acht Möönet het’s bru­ucht, zum dr Alex abschiesse.

D’ Regierig die kiech­let sit Johre ganz flissig
amme Innes­tadt-Netz — mit Tem­po drissig.
I blang uf dä Vorstoos — will i hoff dass i drum,
däne Schlyy­cher zum Trotz, ändlig uff dris­sig kumm.

Gschicht vom Prinz Har­ry kaufe si in Schaare.
Ihm goht’s nur ums Baare sin mir uns im Klaare.
s’isch e Buech ohni Inhalt, und heisse duet’s SPARE,
und dasch e Bangg ohni Pointe …
….. “Du, au die kömmr uns eigentlig schpaare.”

Dr Alex Wil­son, nid dr Hällschti,
wär so gärn dr Allerschnällschti
mit sägs Börg­er und me ganze
Kilo Oggseschwanz im Ranze.

Wiene Schti­er im Tenü Sport
bolzt är zum’ne Wältrekord,
nur hett är mit Dop­ing bschisse
d’WADA merk­ts grad nachem Pisse.

Und will sie ihn zur Pause zwinge
duet dr Bell in’d Bresche springe
und macht ihn, was nid überrascht,
zum Botschafter für Kälbermascht

 

D’ Bärn­er die hänn’s Bundeshuus,
und d’ Luzärn­er dr Pilatus,
Zürcher hänn dr See — und was hänn mir?
Dr Äscheplatz !

Wo hänn d’ Basler s’erschti Hochhu­us gseh?
Und e Dänkmool für Behämmerti?
Und di erschte Verkehrsun­fall — jo wo mach­sch dä?
Am Äscheplatz !

Wo muesch sich­er nie über’s Gras ynelaufe?
Wo kasch dr bil­ligscht Dön­er kaufe?
Wo rennsch fascht bis an Bahn­hof — aber d’ Halt­stell blybt?
Dr Äscheplatz !

Wo fahre Träm­li krüz-und-quer?
Wo stärbe die meis­chte Blinde im Verkehr?
Will sie de wysse Lin­ie folge — diräg­gt under´s Tram?
….
He nai, am Centralbahnplatz !

Im letschte Käller isch es um mi gscheh,
i ha dött mini Traum­frau gseh
und das — nach fufzäh Stange.

I ha schüüch gfrogt kun­sch mit mir hai,
mir hätte’s luschtig, kain blybt elai?
Sie strahlt — ich gseh ihri Spange.

Sie zwinkeret mi lüschtern aa,
i sing no ein und gang voll draa
und sie sait: I sch­pür di scho.

Mini Hor­mon sin jet­zt im siebte Himmel
Dr Kopf mah­nt: Dängg nid mit em …..
Zeche ! Will är weiss: Nur e Jo isch e Jo.

Alles andri isch nai nai nai nai,
Nai nai nai — nur e Jo isch e Jo !
Und ich blyb ellai.

 

Fasnacht 2023 Bilderkaleidoskop 4
A Basic Call to Consciousness - ein Kommentar 29

Deine Meinung

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.